ازيك يا اا، أتمنى تكون أخدت قسط حلو من الراحة عشان تقدر تدخل على مرحلة الـ Editing وتعملها بكفاءة.
الخطوة دي (مرحلة الوحش) من أصعب الخطوات على الإطلاق، وده لسببين:
1- سبب نفسي
2- سبب تقني
السبب النفسي، هو أن من الصعب جدا على الإنسان إنه يشك في شغل هو عمله بنفسه، أو يقلل من شأن نفسه، أو يعترف أنه غلط، أو يقر إنه عمل حاجة وحشة.
وأصلا Core الـ Editing انك تعمل كل اللي انا قلته ده، إنك تشك وتبقي على يقين إن اللى عملته لسه مابقاش أحسن حاجة!
السبب التقني، إن عملية الـ Editing عشان تتم بكفاءة محتاجة حد بيبص في أدق التفاصيل.
حد مؤمن أن الفاصلة والنقطة ممكن تغير مسار الكلام كله وتنقل معنى مختلف، محتاجة واحد يمتلك مهارة الاختصار المفيد، ومهارات التبسيط، ومهارات التعبير عن الأفكار بعدد أقل من الكلام للوصول لأكبر نتيجة ممكنة.
بس فيه خبر حلو!
انت تقدر تعمل كل ده.
أول حاجة تعالي نتخلص من المشكلة النفسية عشان دي الأهم، لأنها لو فضلت موجودة مهما كان مستواك التقني فهو مالوش لازمة.
مش مطلوب منك غير أنك تدرك (تدرك خد بالك) الكام فكرة اللي جايين دول:
- مفيش حد بيوصل للكمال، مستحيل.
- مهما كنت عامل حساب كل حاجة، برضو فيه حاجات مش هتظبط، ما قولنا مفيش حاجة كاملة.
- كل حاجة تقريبا عبارة عن Draft.
- أول طريق قتل الـ Creativity هو المقارنة بالغير.
- الغلط جزء من كونك بني آدم، وجزء من عملية التعلم.
- انت بتعدل وبتطلع الأخطاء اللي مكنتش واخد بالك منها وانت شغال، عشان اما يخرج للناس يبقى في ابهي صوره.
- محدش بيطلع الدور العاشر قبل الدور الأول.
- أول طريق التأكد أن كل حاجة مظبوطة ومحنتفة، هي الشك في كونها ممكن تبقى مش مظبوطة.
اطبع الافكار دى فى ورقه وحطها قدام منك، واقرأها كل ما تيجي تعمل محتوى.
زمان، كنت شغال في محل ديكور في العتبة، وكنت أكتر الوقت بكون مسئول عن المخازن، وأما كانت بتيجى بضاعة، كنت برصها وبظبط المخزن إلخ.
المهم كنت حرفيا بيطلع عينى طول النهار، وعلى آخر النهار صاحب الشغل كان يطلع المخزن عشان يبص.
في الوقت ده انا كنت بكون مخلص، ولكن صاحب الشغل مبيعجبوش ويتهمني اني مقصر، ولكن أول ما أجيب المقشة وأكنس الأرض، وأشيل الورق والشنط والذى منه، يبان شكل المخزن، و مجهودى كله يكون واضح وضوح الشمس، وساعتها بس صاحب الشغل كان يمدحنى.
فهمت الفكرة والمغزى من خطوة الـ Editing؟
انت في مرحلة الكتابة، كنت بتكتب كل حاجة بتيجى فى دماغك ليها علاقة بفكرة المحتوى!
إنما دلوقتي جه الدور أنك تلمع وتظهر جمال وجوهر المحتوى بتاعك.
على فكرة لو تجاهلت الموضوع ده - وانا عارف إنك ممكن تعمل كده - هتفضل تعمل محتوى وحش حتي بعد ما تخلص الكورس، اسأل مجرب.
إنما لو صدقت الكلام اللي فات ده، يبقي انت جاهز نفسيا عشان تعمل الـ Edit على المحتوى.
وكده أقدر أقولك يلا بينا نتكلم في إزاى نعمل Edit صح للمحتوى عشان يظهر جماله.
ازاى تعمل Editing؟
بص يا سيدى، هنقرا المحتوى 7 مرات وفى كل مرة هنكون مركزين على جزء معين …
1- أول مرة هتظبط الأخطاء الإملائية.
2- تاني مرة هتظبط علامات الترقيم (الفاصلة والنقطة وعلامات الاستفهام)، بس خد بالك يكونوا في مكانهم الصحيح.
3- تالت مرة تظبط حجم البراجرافات والمسافات بينها، وهـ تحط الـ Headings ولو فيه Subtitles مش مظبوط تظبطها.
4- رابع مرة هتشوف صياغة المحتوى، هل دى انسب صياغة للجملة، هل الجملة بسيطة وواضحة كفاية عشان الناس تفهم الرسالة اللي جوه المحتوى، وطبعا هتشيل أي كلام ملوش لزمة أو هري.
5- المرة دى هتتاكد أن الأفكار اللي انت كنت مجمعها في الخطوة التالتة (تنظيم الأفكار) معروضة بشكل متسلسل ومترابط.
6- سادس مرة هتتأكد أنك مطلعتش بره الـ Brand Voice بتاع البيزنس، يعني لو فيه كلمة ما أو تعبير ما مش مناسب مع شخصية الشركة يبقي تشيله.
7- آخر مرة بقى (المرة السابعة) هتقرا فيها المحتوى عشان تتأكد إن كل حاجة متناسبة ومربوطة ببعض وشكلها حلو، و مفهومة بالكامل، وكل فكرة فيها واخدة حقها في الظهور.
كده انت عرفت الحاجات اللي هتعمل عليها Edit.
خد بالك لو شايف أن السبع مرات كتير وحاسس إنك هتزهق، مفيش مشكلة لو هتعمل Edit على كل الحاجات اللي قلنا عليها فى مرة واحدة.
ولكن خد بالك صعب تلم كل الحاجات اللي قولت عليها فأقل من 3 مرات، وبعدين ما تقرأ المحتوى 7 مرات وكل مرة ركز على حاجة واحدة من اللى قولنا عليها، مستعجل ليه؟
ركز في اللي جاي بقي!
المحتوى عبارة عن شوية فقرات، والفقرة عبارة عن جمل، والجمل عبارة عن كلمات ...
معنى كده إن مطلوب منك تبص في مستوي كل كلمة وتحدد مدى قوتها أو ركاكتها، والعاطفة اللي بـ تثيرها (كل كلمة فيه عاطفة معينة بتثيرها عند الناس، اختار الكلمات اللي تعبر عن العاطفة اللي انت عايز تثيرها بعناية).
ومدى ترابط الكلمات دى كلها مع بعض، عشان تكون الجملة ليها معنى واضح، وتوصل المعنى أو الرسالة المرغوب توصيلها ببساطة.
ومدى ترابط كل الجمل مع بعض، عشان الناس تحس أن كل فقرة مفهومة بوضوح.
ومدى ترابط كل فقرة مع اختها، عشان يكون في النهاية المحتوى كله ماسك نفسه، وجواه فكرة واضحة بيوصلها ببساطة.
حقيقي لازم تدي الخطوة دى حقها، ده لو انت حاسس انك فنان ومسوق، مش مجرد كاتب والسلام.
PS: بكرة هشارك معاك خطوة أنت مبتعملهاش ولكن الغلط المرة دى مش عليك، إنما فى البيئة اللى حواليك.
ايميل بكرة مهم جدا.
إلى اللقاء.
Unsubscribe | Update your profile | Al Fardoos, Giza, 6th of October 12566
تعليقات
إرسال تعليق